- Hoxe presentouse a VII edición do Certame de Microrrelatos dirixido a nenos, mozos e adultos, en colaboración coa Secretaría Xeral de Política Lingüística da Xunta e Pousadas de Compostela
- Este ano colabora ademais na Carreira Camiño das Letras e volve colaborar nos premios do Concurso-Exposición Letras Galegas 2018 convocado pola Secretaría Xeral de Política Lingüística
- A campaña de animación á lectura “Practica a LEITura” permite optar a un dos 150 carteis vintage que Feiraco sorteará ata o 27 de maio
Ponte Maceira, 02 de maio de 2018.- Hoxe deuse a coñecer en Santiago de Compostela a sétima edición do tradicional Certame de Microrrelatos que impulsa Feiraco para celebrar a festividade das Letras Galegas. Organizado en colaboración coa Secretaría Xeral de Política Lingüística da Xunta de Galicia e Pousadas de Compostela, no acto de presentación participaron os representantes de CLUN, José Montes e Pablo Gómez, o secretario xeral de Política Lingüística, Valentín García; o viúvo de María Victoria Moreno, autora homenaxeada neste 2018, Pedro Ferriol, e o director-xerente do grupo Pousadas de Compostela, José Manuel Otero.
Este ano, ademais, Feiraco ten programadas outras accións conmemorativas pola festividade do 17 de maio como a campaña de animación á lectura “Practica a LEITura”, que sortea 150 exclusivos carteis vintage; a reedición dos contos De onde vén o leite?, para explicarlles aos máis pequenos o proceso de obtención do leite desde a granxa á mesa; e colabora na V Carreira Camiño das Letras e no Concurso-Exposición Letras Galegas 2018, que convoca anualmente a Secretaría Xeral de Política Lingüística dirixido a centros de educación infantil, primaria, secundaria, formación profesional e ensinanzas especiais.
VII Certame de Microrrelatos
Por sétimo ano consecutivo, Feiraco impulsa o seu xa tradicional Certame de Microrrelatos Letras Galegas 2018, incentivando a creación literaria e animando a todos os galegos que queiran participar a compartir os seus relatos a través dunha aplicación que estará dispoñible desde hoxe na páxina oficial Facebook/Feiracolacteos (https://www.facebook.com/Feiracolacteos/).
Establécense dúas categorías: de adultos (a partires dos 19 anos) e infantil-xuvenil (de 13 a 18). Para participar será necesario compartir na aplicación do concurso que está subida á web de Feiraco un relato orixinal, escrito en galego, que comezará coa frase “Subiu ata o faiado da casa e alí…”da obra A festa no faiado, protagonizada pola boneca Uxía, da autora homenaxeada este ano, Ana María Victoria Moreno, que non debe superar os 500 caracteres incluídos espazos e a frase inicial proposta.
Todos os interesados en participar poderán consultar as bases legais do certame en Facebook/Feiracolácteos.com e terán que enviar os seus microrrelatos desde hoxe ata o vindeiro 17 de maio.
Campaña “Practica a LEITura”
Vixente nas redes sociais de Feiraco desde o pasado 23 de abril ata o 27 de maio, a acción busca animar a todos os públicos a Alimentar un Xeito de Ser a través da lectura. Por medio dun xogo de palabras, a campaña convida a unir os bos hábitos alimentarios de consumo de leite coa práctica saudable da lectura. Para optar a un dos 150 exclusivos carteis vintage de Feiraco, os consumidores terán que adquirir unha caixa de leite Feiraco de calquera variedade, facerse seguidor da páxina oficial de Feiraco en Facebook, acceder á App da promoción e, finalmente, subir unha fotografía do ticket de compra dunha ou varias caixas de leite.
Reedición dos contos De onde vén o leite?
Hoxe tamén se presentou a reedición dos contos infantís De onde vén o leite? cuxos contidos foron actualizados para continuar ilustrando os máis pequenos sobre os procesos de obtención do leite desde a granxa á mesa. Os novos exemplares serán distribuídos entre boa parte dos centros de ensino galegos para uso da comunidade docente de infantil e primaria. Tamén estarán dispoñibles en diferentes canles dixitais da cooperativa e mais da Consellería de Educación, Cultura e Ordenación Universitaria.
Carreira Camiño das Letras e Concurso-Exposición Letras Galegas 2018
Feiraco participará tamén na tradicional Carreira Camiño das Letras, o 17 de maio, mediante o aporte de produtos lácteos que serán distribuídos entre os participantes que inicien a ruta no Pico Sacro e finalicen na Cidade da Cultura. A carreira, organizada por Xurdir en colaboración coa Consellería de Educación, Cultura e Ordenación Universitaria, busca unir a práctica deportiva coa conmemoración do Día das Letras Galegas e co simbolismo do Camiño de Santiago.
A cooperativa colabora por segundo ano nos premios do Concurso-Exposición Letras Galegas 2018 da Secretaría Xeral de Política Lingüística, destinado a centros de ensino e cuxos proxectos gañadores chegan a case 2000 puntos de Galicia e do exterior. Os centros que se fixen cos premios desta edición (CEIP Xesús San Luís Romero de
Carballo, A Coruña; e IES Gonzalo Torrente Ballester de Pontevedra) disporán de numerosos produtos lácteos de Feiraco.
Compromiso con Galicia e os seus valores
As diferentes accións conmemorativas reflicten o compromiso de CLUN (Cooperativas Lácteas Unidas) con Galicia, coa súa lingua e coa súa xente. A cooperativa, nacida da Unión de Feiraco, Melisanto e Os Irmandiños, comercializa os mellores lácteos de Galicia baixo as marcas Feiraco, Únicla, Clesa e os queixos Arquega.