Categoría: Prensa

• FEIRACO presenta a súa nova imaxe cun deseño actual, reflexo dos valores da maior cooperativa láctea de Galicia: cooperativismo, rural e naturalidade.
• Unha actualización que será visible nos envases da marca, agora, protagonizados polos gandeiros e gandeiras da cooperativa CLUN

FEIRACO estrea nova imaxe na que o campo galego e as persoas que o fan posible, son os grandes protagonistas. Nesta renovación, os gandeiros e gandeiras da cooperativa CLUN, a maior cooperativa láctea de Galicia, son o foco central, poñendo así en valor o seu traballo e compromiso coa produción dun leite 100% galego, de cooperativa e de calidade.

Fiel á súa esencia cooperativista, FEIRACO reforza con este cambio a súa identidade e aposta pola transparencia e a proximidade cos consumidores. Os novos envases destacan historias reais dos gandeiros e gandeiras da cooperativa CLUN, amosando a cara detrás dos seus produtos e do sector lácteo. Subliñando así a importancia de apoiar ao campo galego.

Un deseño que mira cara ao futuro, sen perder a esencia

“Con este novo deseño, modernizamos a nosa imaxe mantendo a esencia de FEIRACO, á que tantos galegos e galegas lle teñen cariño. Tíñamos claro que algún elemento icónico debía permanecer: a nosa vaca, elemento que acompaña á marca dende a súa orixe, segue presente, pero agora mira cara adiante, simbolizando o futuro”, destacan desde a cooperativa.

Cada novo envase de leite incluirá no seu lateral a fotografía de varios dos máis de 3.000 gandeiros e gandeiras da cooperativa CLUN, con presenza en máis de 80 concellos de toda Galicia, xunto cun pequeno texto sobre a súa historia e a súa vinculación co campo e a gandería. Ademais, incorporarase un código QR para acceder a máis información sobre cada gandeiro, achegando aos consumidores á realidade do sector lácteo galego.

Esta nova imaxe reforza o compromiso da marca coa orixe galega do leite e co apoio ao sector gandeiro, complementándose con outras frases que aparecerán nos envases, como:

• “Mercando este leite, apoias directamente ao campo galego”.
• “100% leite galego de cooperativa rural”.
• “Coidamos cada paso, o mellor da nosa terra”.
• “Propiedade de gandeiras e gandeiros”.

Con esta renovación, FEIRACO reafirma a súa aposta polo cooperativismo e polo leite galego de calidade, achegando aos consumidores unha marca que non só alimenta, senón que conta historias reais do campo e da gandería.

Porque, se algo diferenza á marca láctea é a súa histórica orixe cooperativa, que está agora máis presente, presumindo de quen fai posible que Galicia sexa terra de leite de calidade: gandeiros profesionais, dedicados e responsables co campo.

• Os representantes dos traballadores e a dirección de Feiraco Lácteos SL firmaron, na tarde do pasado xoves, 5 de decembro, o convenio colectivo co respaldo unánime dos sindicatos CIG (Confederación Sindical Galega) e UGT (Unión Xeral de Traballadores)
• Este firma reflexa o bo entendemento e a colaboración entre a empresa e os traballadores, principios fundamentais no marco cooperativo de Feiraco Lácteos.
• Juan Gallástegui, director xeral de CLUN, destaca que o novo convenio “fortalece a cohesión e o benestar no noso proxecto colectivo de poñer en valor o rural galego”

A dirección de Feiraco Lácteos e os representantes renovaron o convenio colectivo da empresa por un período de tres anos, o que asegura a súa vixencia ata decembro do 2026. O acordo, que beneficia a unha centena de traballadores foi firmado de xeito unánime polos sindicatos con representación na empresa: a CIG (Confederación Sindical Galega) e a UGT (Unión Xeral de Traballadores).

Este convenio é un reflexo dos principios cooperativos de Feiraco Lácteos, onde a colaboración, o compromiso mutuo e a cohesión son esenciais para o bo funcionamento desta empresa, que forma parte da Cooperativa CLUN. O acordo subraia o compromiso coa igualdade, a conciliación, a seguridade e a flexibilidade, proporcionando un marco de estabilidade que recoñece o esforzo colectivo e o traballo en equipo. O acordo acadouse grazas á confianza mutua, co compromiso de adaptarse ás tendencias laborais actuais e coa visión de seguir crecendo xuntos como parte da cooperativa CLUN.

Juan Gallástegui, director xeral de CLUN, señalou “este convenio reflexa o espírito cooperativo que caracteriza a Feiraco Lácteos e a toda a cooperativa CLUN, onde a colaboración e o esforzo conxunto entre todos os que a forman son esenciais para o desenvolvemento e a profesionalización iniciada en 2021”. Así mesmo “é un paso máis no noso compromiso coa innovación, a dixitalización e a mellora da produtividade, sempre co enfoque de fortalecer a cohesión e o benestar de todos os que formamos parte deste proxecto colectivo que busca poñer en valor o rural galego”.

• O xurado, presidido por Amparo Alonso Betanzos, concedeu catro segundos premios a alumnado do IES Rosalía de Castro (2), do IES Brión e do IES Val Miñor de Nigrán

FEIRACO patrocinou a sexta edición dos Premios Stephen Hawking para apoiar o ensino galego da man do IES Rosalía de Castro de Santiago de Compostela. Un centro que entregou o pasado venres o primeiro premio deste certame, dotado con 1.500 €, a Daniela Montoto Pereira, Leyla Villar Abella e Anxo Vázquez Manzano, do IES Blanco Amor de Ourense, polo seu traballo “Demostración e descubrimento automático de teoremas xeométricos mediante bases de Gröbner”, coordinado por Carlos Ferreiro García.

Os galardóns foron entregados o venres no salón de actos do instituto compostelán, nun acto que incluíu unha conferencia de Amparo Alonso Betanzos catedrática de Ciencias da Computación e Intelixencia Artificial da Universidade da Coruña, e un cóctel con produtos de FEIRACO.

O VI Premio Stephen Hawking de Xóvenes Investigadores, coordinado por Amparo Alonso Betanzos (Vigo, 1961), foi convocado polo IES Rosalía de Castro e conta coa colaboración da Consellería de Educación, Ciencia, Universidades e Formación Profesional, FEIRACO, Finsa e Ternera Gallega. O apoio de FEIRACO e CLUN a estes novos investigadores é reflexo da aposta da cooperativa pola innovación, un dos alicerces do noso crecemento e do noso proceso de mellora día a día, buscando sempre a calidade e a eficiencia en todas as fases e procesos da cadea de valor.

Premiados

O xurado concedeu catro segundos premios aos traballos: “Estudo do crecemento e supervivencia de larvas cunha dieta de polipropileno”, de Irene Lazzari Otero do IES Rosalía de Castro (coordinado por Sandra Vázquez Dorado), “Simulación computacional da interacción da magainina con modelos simplificados de membranas bacterianas e de mamíferos sans”, de Mikel Escobar Díaz, Álvaro Francos Martínez e Unai Peral Fernández do IES Brión (coordinado por Virginia Rodríguez Álvarez); “Aproximación á determinación dun índice para a comparación da cantidade de ácido ascórbico e da pegada de carbono en zume de diferentes tipos de kiwis”, de Antía Toinmil Estévez do IES Rosalía de Castro (coordinado por Jesús Fidalgo Fernández); e “Estudo da presenza de microplásticos na costa valmiñorana”, de Ariane Antequera González e Eva Leyenda de Arriba, o IES Val Miñor de Nigrán (coordinado por César Rodríguez López).

Así mesmo, concedeu dez terceiros premios a alumnado do IES Rosalía de Castro de Santiago (3), Do IES Arcebispo Xelmírez II de Santiago (2), do IES Eusebio da Guarda da Coruña (2), do IES Ramiro de Maeztu de Madrid, do IES Castilla de Soria e do IES Nosa Señora dos Ollos Grandes de Lugo. Uns premios merecidos pola calidade científica dos mesmos: “todos os traballos contaban cunha enorme calidade en materia de investigación”, explica o director do IES Rosalía de Castro, Xabier Mouriño. O alumnado tivo dez minutos para expoñer os seus traballos: “Tanto a presentación como a defensa dos rapaces foi moi boa”, engadiu o director, quen tamén quixo destacar o gran número de participación de alumnos e centros educativos.

En total presentáronse hoxe 54 traballos de estudantes de once institutos: nove galegos, un de Soria e outro de Madrid. Os traballos xiraban en torno a dous eixos: a figura de Amparo Alonso Betanzos e a súa contribución á intelixencia artificial; e a lenda desta edición: “Intelixencias”. A bioloxía e xeoloxía foron o campo con maior peso, pero tamén houbo representación en física e química, matemáticas, no ámbito tecnolóxico coa presenza da robótica, das ciencias sociais ou de índole artística.

Os centros que tomaron parte nestes VI Premios Stephen Hawking foron: IES Arcebispo Xelmírez II e IES Rosalía de Castro (Santiago de Compostela), IES Brión (Brión, A Coruña), IES Eusebio da Guarda (A Coruña), IES Lucus Augusti e IES Nosa Señora dos Ollos Grandes (Lugo), IES Blanco Amor (Ourense), IES Xermán Ancochea Quevedo (Póboa de Trives, Ourense), IES Val Miñor (Nigrán, Pontevedra), IES Castilla (Soria) e IES Ramiro de Maeztu (Madrid).