- A iniciativa ‘Todo se decide no campo’ resolve a histórica rivalidade nun partido xogado nun prado e arbitrado por unha gandeira
- Froito desta unión, creamos unha edición limitada de camisetas, metade celestes e metade azuis, representando así aos dous equipos galegos
Feiraco pon en marcha unha nova entrega da iniciativa ‘Todo se decide no campo’ unindo deporte, humor e tradición para conectar co público galego. Aproveitando a histórica rivalidade entre os dous grandes equipos do fútbol galego, a marca, integrada na Cooperativa Rural Galega CLUN, leva a competición a un terreo moi especial: o campo, o corazón do rural galego.
Nesta ocasión, as novas fichaxes de Feiraco son dúas das figuras máis relevantes do fútbol galego: Iago Aspas, de Moaña, e David Mella, de Teo, dous futbolistas ‘made in Galicia’ que se ven inmersos nun reto que vai máis aló do terreo de xogo xa que se desenvolve nunha pradería, un escenario moi distinto ao habitual.
Alí, desafiados por unha gandeira da cooperativa que exerce de árbitra, compiten nunha proba na que o deporte rei se mestura co traballo no campo, o que fai que ámbolos dous futbolistas teñan que facer fronte a obstáculos do menos usuais, como un tractor, vacas pastando ou pacas de palla.
Unha camiseta especial
Como símbolo desta unión sen precedentes, Feiraco crea unha camiseta especial, metade celeste e metade azul, representando as cores dos dous equipos galegos e a capacidade da marca para estar presente no corazón da nosa terra. Como mostran ao final da peza audiovisual, a marca logra unir o que parecía imposible a prol dun único equipo, o de Feiraco. Estas camisetas poderán conseguirse a través de sorteos que realizará a marca a través das nosas redes sociais oficiais.
Con esta iniciativa, Feiraco xoga co poder das palabras para reivindicar que tanto no fútbol como na produción láctea, grazas ao traballo coidado dos gandeiros e gandeiras, todo se decide no campo. Desta maneira, logra sintetizar os valores que os definen como marca: autenticidade, galeguidade, conexión co campo e tradición.