Ames, 16 de outubro de 2026. CLUN participará do 17 ao 21 de outubro en SIAL París 2026, unha das principais feiras internacionais do sector alimentario, onde presentará internacionalmente YOGU+ Kids, a última innovación da súa gama exportadora. A cooperativa aproveitará esta cita, que reúne a profesionais, fabricantes e distribuidores de todo o mundo, para dar a coñecer a súa nova referencia infantil e seguir fortalecendo as relacións comerciais nos mercados internacionais.
O equipo de Exportación de CLUN estará presente no pavillón 2, stand L280, nun encontro estratéxico para compartir co sector as novidades da cooperativa e explorar novas oportunidades de negocio. Todas as súas marcas, Feiraco, Clesa, Únicla A2, YOGU+, Garea e Xoia, estarán representadas na feria, amosando a capacidade de CLUN para transformar leite de máxima calidade en produtos de valor engadido destinados a consumidores e distribuidores de todo o mundo.
YOGU+ Kids, a nova aposta para o mercado internacional
A principal novidade que CLUN levará a SIAL París será YOGU+ Kids, o último lanzamento da familia YOGU+, unha gama de iogures pasteurizados despois da fermentación que xa está presente en máis de 66 países. Elaborados con leite fresco de Galicia como ingrediente principal, estes produtos combinan a calidade da materia prima cunha proposta adaptada ás necesidades e preferencias dos consumidores.
YOGU+ Kids incorpora unha receita especial enriquecida con vitamina D, un nutriente que contribúe ao mantemento dos ósos e dos músculos en condicións normais e que é necesario para o crecemento e o desenvolvemento normais dos ósos nas nenas e nenos. Tanto a imaxe do produto coma o seu sabor foron coidadosamente seleccionados para conectar co público infantil.
Con este lanzamento, a familia YOGU+ amplía a súa oferta, que conta con referencias de sabores como natural, morango, vainilla, plátano e macedonia de mango, ás que se suma agora YOGU+ Kids de morango e plátano. A súa presentación internacional en SIAL París supón un novo paso na estratexia de desenvolvemento e expansión exterior da cooperativa.
Do rural galego aos mercados de todo o mundo
SIAL París constitúe un dos principais puntos de encontro internacionais para a industria alimentaria e unha oportunidade para coñecer tendencias, compartir innovacións e establecer novas relacións comerciais. A edición de 2026, que se celebra do 17 ao 21 de outubro en Paris Nord Villepinte, reunirá a empresas e profesionais de numerosos países arredor das últimas novidades do sector.
Para CLUN, a participación nesta feria permite reforzar a súa proxección internacional e poñer en valor o traballo realizado desde o rural galego, apostando pola transformación de leite de calidade en produtos innovadores e competitivos. A presenza do equipo de Exportación facilitará, ademais, o contacto directo con clientes actuais e potenciais socios comerciais, así como a identificación de novas oportunidades para as marcas da cooperativa.

