Entra ben unha larpeira típica do San Xoán, non? Pois temos unha súper boa noticia! En Feiraco decidimos preparala co noso leite galego de cooperativa pois #EnGalegoSabeMellor. O resultado? Móllate e dinos que che parece! Nós só podemos adiantarche que está para repetir unha e outra vez.??
Ingredientes para a masa
100 ml de leite enteiro Feiraco
3 ovos
50 gramos de azucre
450 gramos de fariña de forza
60 gramos de manteiga
30 gramos de fermento fresco de panadaría
20 gramos de anís
1 culleradiña de sal
A reladura dun limón
Ingredientes para a crema pasteleira
250 ml de leite enteiro Feiraco
1 ovo
30 gramos de azucre
20 gramos de fécula de millo
1 monda dun limón
1 culleradiña de pasta de vainilla
Ingredientes para o almibre (opcional)
50 ml de auga
50 gramos de azucre
50 gramos de anís
Preparación da masa do bolo
Comezar quentando un pouco o leite e, cando estea morno, retirar do lume e engadir o fermento.
Nunha cunca poñer a fariña e engadir o resto de ingredientes deixando para o final o leite co fermento que preparamos ao comezo.
E chega un dos momentos máis importantes! Amasamos durante quince minutos con paciencia e cariño pois leva o seu tempo. Se ves que é necesario, podes incorporar durante este proceso un pouco máis de fariña. Éche un bo truco!?
Agora pon nunha bandexa con papel vexetal a nosa súper bóla e deixa reposar durante 1 hora e 30 minutos. Durante este tempo, imos aló coa crema pasteleira.?
Preparación da crema pasteleira
Diluír 50 ml do leite enteiro Feiraco coa fécula de millo e deixar reposar. Mentres, imos batendo nun bol o azucre co ovo.
Agora toca quentar o resto do leite, a monda do limón e a culleradiña da pasta de vainilla. Unha vez que ferva, retirar a pota do lume e engadir o noso preparado do ovo e azucre mesturando ben.
Poñer de novo a crema a cocer e engadirlle o leite coa fécula de millo. É moi importante non parar de remover ata que comece a ferver de novo. Toma nota!
Retiramos do lume e continuamos remexendo ata obter unha mestura homoxénea. Finalmente, verter a crema pasteleira nunha cunca. Tapar con film para que non faga costra.
Preparación da larpeira
Comezamos prequecendo o forno a 180ºC con calor enriba e embaixo.
Estira a masa para darlle a forma á larpeira que máis che guste. Cun coitelo fai cortes en cadrados ou rombos, como prefiras, con profundidade, mais sen cortar a base da torta.
Chegou a nosa parte favorita! ? É hora de sacar o noso lado máis artista! Cun pincel de cociña teremos que pintar a superficie da masa cun ovo ben batido e reencher unha manga pasteleira coa crema para facer o debuxo típico da larpeira polos carrís que fixemos co coitelo.
Rematamos mesturando o azucre co anís para logo decorar aqueles ocos da larpeira onde non botásemos a crema.
E listo! Xa podemos enfornar a nosa obra de arte durante 20/25 minutos a 180ºC. Que gañas tiñamos deste momento ??
Preparación do almibre (opcional)
Mentres esperamos, imos preparando o almibre. Poñemos nunha pota o azucre, a auga e o anís durante sete minutos sen parar de remexer.
Cando teñamos a larpeira fóra do forno, empaparemos a súa superficie de almibre e agardamos que arrefríe para consumir.
Tiñamos moitas ganas de que chegase este momento! Cóntanos como che foi!
