Estas galletas teñen un sabor exquisito grazas á nata Feiraco. Son moi doadas de facer e se tedes nenos na casa, seguro que se animan a axudarvos! Antes de nada: faite cuns moldes en forma de letras!
Ingredientes
1 ovo
200 g de fariña de trigo
200 g de fariña de espelta (pode substituírse por fariña de trigo)
200 ml de nata para montar Feiraco
150 g de azucre
1 sobre de fermento químico (8 g)
sal
Preparación
Monta o azucre co ovo ata que branquee. Mestura coa nata.
Engade a fariña, o sal e o fermento e integra con axuda dun garfo ou unha culler.
A masa é pegañenta, non te preocupes. Forma unha bóla e gárdaa nun recipiente pechado na neveira como mínimo durante 1 hora.
Saca a masa da neveira e estíraa sobre unha superficie con fariña coa axuda dun rodete ou unha botella ata que quede unha lámina de 0,5 cm de espesor. Tenderá a pegarse, así que engade fariña aos poucos.
Recorta as galletas con moldes de letras (ou con axuda dun vaso) e colócaas na placa de forno sobre papel de enfornar.
Enfornamos durante 10 minutos a 180º (forno prequentado). Retiramos e deixamos arrefriar sobre unha reixa.
Gárdanse moi bien nunha lata durante uns días, pero seguro que dades boa conta delas en canto arrefríen!