Do frigorífico? Do supermercado? Máis alá das bromas habituais, en Feiraco estamos convencidos de que a maioría dos nenos galegos si coñecen cal é a orixe do leite. Iso si, dende había moito tempo roldábanos pola cabeza a idea espertar a súa curiosidade ensinándolles máis de preto como é o seu proceso de produción, dende a granxa ata a mesa.
Foi así como se nos ocorreu poñer en marcha a iniciativa #deondevénoleite, unha experiencia coa que queremos contribuír a poñer en valor en rural galego e que, sen dúbida, nos colmou de grandes momentos na cooperativa. Tanto é así… que estamos a preparar unha nova edición! Permanecede atentos!
Visitas guiadas, contos… e moito máis!
#deondevénoleite é un proxecto dirixido a escolares de Galicia que inauguramos este curso en colaboración con varios centros de ensino. Nesta primeira edición, visitáronnos máis de 1.000 nenos e nenas dos ciclos de infantil e primaria, procedentes de Zas, Negreira, Brión, Mazaricos, Santiago…
Movíanos a inquietude de iniciar aos pequenos no coñecemento dun sector tan importante en Galicia como o gandeiro, amosándolles sobre o terreo as tarefas cotiás dunha das nosas explotacións. Queriamos que coñecesen a forma de traballar da nosa cooperativa e cal é o camiño que percorre o leite dende a súa orixe nas granxas ata a mesa do seu almorzo: como é o coidado das vacas, a súa alimentación e muxidura, que tratamento recibe o leite na fábrica, como se realiza o envasado, que tipo de produtos se fan con el…
Que ben o pasamos! Cos ollos como pratos, os nenos gozaron como nunca da visita guiada, fixeron unha morea de preguntas e puxeron todo o seu empeño nos xogos e actividades que lles propuxemos durante a xornada. Por non falar das gargalladas que levantou contacontos coa historia da vaca Chenoa namorada…
Enriquecedor para eles… e tamén para nós!
As aventuras de Roi e Belén
Con motivo de #deondevénoleite, en Feiraco tamén editamos dous contos, un para infantil e outro para primaria, sobre o proceso do leite e o traballo da cooperativa.
Roi e Belén son dous nenos que, ao igual que os que participaron con nós, visitan por primeira vez unha granxa e descobren os segredos do sector leiteiro en Galicia.
Ademais de obsequiar con eles aos nenos participantes, coincidindo coa iniciativa decidimos pintar a parede dunha das nosas granxas coas súas ilustracións: un conto de máis de 15 metros sobre o proceso do leite que acapara todas as miradas de pequenos e maiores.
Tamén distribuímos gratuitamente a primeira edición dos libros en distintos puntos de venda de Galicia. Se quedastes sen eles, podedes descargalos dende a nosa web, tanto a versión de infantil coma a de primaria. Veredes como lles gusta!