Ver vídeo: Link ao vídeo
-
- Presentamos a continuidade desta relación cun vídeo co lema ‘Xuntos en Primeira’
- Mantemos a nosa aposta por ser proveedor oficial do club de leite, polo impulso do deporte base e feminino e pola promoción de hábitos de vida saudables
A Coruña, 17 de setembro de 2026. Dende Feiraco, marca integrada na cooperativa rural galega CLUN, renovamos a nosa alianza co RC Deportivo da Coruña para a tempada 2026/2027, unha tempada especialmente ilusionante polo regreso do club branquiazul á elite do fútbol español.
Presentamos a undécima tempada desta colaboración baixo o lema ‘Xuntos en Primeira’, cun vídeo que reforza o estreito vínculo que nos une con esta entidade e os valores comúns que compartimos: o compromiso, o esforzo, o traballo en equipo e a proximidade ao territorio.
Somos proveedor oficial do R.C Deportivo e os nosos produtos están presentes no comedor da cidade deportiva de Abegondo. Tanto o noso leite como os nosos iogures forman parte da alimentación diaria dos profesionais que integran a estrutura deportiva, dende os xogadores dos primeiros equipos masculino e feminino, así como os equipos técnicos.
Na cooperativa amosámonos «ilusionados por esta tempada, e polos resultados acadados. Gústanos pensar que os xogadores tomen leite Feiraco cada día contribuíu dalgunha forma a chegar ata aquí. E con esa ilusión continuamos esta tempada a colaboración». Do mesmo xeito, sinalamos que «a lonxevidade desta relación vai moito máis alá do fútbol, trátase tamén de fomentar unha vida en movemento e con boa alimentación, de desfrutar e compartir ilusión en cada partido, e de que o deporte galego siga colleitando éxitos».
Esta visión común aséntase nun piar fundamental para nós: a aposta polo futuro. No club coruñés, esta materialízase no seu traballo de canteira, unha das máis frutíferas de todo o fútbol español. Conscientes disto, mantemos o noso apoio á Fundación RC Deportivo mediante iniciativas como DéporEscolas e o DéporCampus, programas formativos que cada ano achegan a práctica deportiva, os hábitos saudables e os valores do deportivismo a case 3.000 nenos e nenas de toda Galicia na derradeira edición.
Coa renovación desta alianza, reafirmamos xunto ao RC Deportivo da Coruña o noso compromiso coa construción dun proxecto común e duradeiro, centrado no desenvolvemento das novas xeracións, a posta en valor do territorio e a combinación de deporte e boa alimentación como claves dun estilo de vida saudable. «Para moita xente, Feiraco evoca a mellor época da historia branquiazul; e ilusiónanos estar ás portas doutra etapa dourada do fútbol galego», confesamos dende CLUN.