(ATENCIÓN! Estivemos recibindo relatos sen a información de contacto. Se enviaches o teu relato a través da web, escríbenos a [email protected])
Esta iniciativa honra a Begoña Caamaño, escritora e xornalista que, na súa obra, reinterpreta desde unha ollada feminina historias míticas, dándolles voz a personaxes como Circe, Penélope ou Morgana.
En FEIRACO, o Día das Letras Galegas é unha cita importantísima dentro do noso compromiso con Galicia e coa súa cultura. É por iso que nos fai moita ilusión presentar o XIV Certame de Microrrelatos. Neste caso, quixemos homenaxear a figura e o legado de Begoña Caamaño, poñendo en valor o seu impacto literario e ideolóxico. Polo tanto, decidimos que a temática do certame deste ano sería “Vai de mulleres”.
En que consiste?
O certame deste ano estriba en crear unha historia situada en Galicia e protagonizada por mulleres. A extensión do texto non pode superar as 500 palabras e avaliarase en función de tres criterios: a orixinalidade (50% da valoración), a coidada redacción (25%) e o uso correcto da lingua galega (25%). Os participantes terán entre o 13 de abril e o 17 de maio para subir á páxina web os seus relatos.
Como participar?
Existen dúas categorías: a categoría xuvenil e a categoría de adultos.
No caso da categoría xuvenil, dirixida a alumnos de ESO e bacharelato, o profesorado de cada centro seleccionará o mellor relato de cada curso e os escollidos subiranse en formato PDF á web feiraco.es onde se debe cubrir ademais un sinxelo formulario de contacto. En canto á categoría de adultos, o autor ou autora deberá subir o seu relato en PDF á web feiraco.es.
Os premios!
Levamos máis de dez anos celebrando este concurso e queremos que cada edición sexa especial. Unha parte importante diso son os premios que preparamos para os gañadores:
1º premio: cadro con lámina ilustrada, 4 libros, lote de produtos FEIRACO, bolsa FEIRACO e marcapáxinas.
2º premio: 2 libros, lote de produtos FEIRACO, bolsa FEIRACO e marcapáxinas.
3º premio: 1 libro, lote de produtos FEIRACO, bolsa FEIRACO e marcapáxinas.
Sobre Begoña Caamaño:
Begoña Caamaño Rascado (Vigo, 14 de outubro de 1964 – Santiago de Compostela, 27 de outubro de 2014) foi unha figura polifacética, destacando como xornalista, escritora, e activista política.
Nas súas obras, Circe ou o pracer do azul (2009) e Morgana en Esmelle (2012), a súa narrativa caracterízase por unha profunda reivindicación feminista e pola recreación de mitos clásicos desde unha perspectiva feminina. Foi promotora de MUGACOM (Asociación de Mulleres Galegas na Comunicación) para loitar pola igualdade laboral e o tratamento da imaxe feminina nos medios, ademais de participar activamente en movementos contra a violencia de xénero.
En resumo, Begoña Caamaño foi unha intelectual comprometida que utilizou tanto o xornalismo como a literatura para darlles voz ás mulleres e defender a liberdade informativa e os dereitos sociais en Galicia.
