Obradoiro para o empoderamento da muller como persoa socia da cooperativa é o título do ciclo de sesións que acolle a Rede Eusumo na Fundación Feiraco este verán. Os técnicos especialistas da Asociación Galega de Cooperativas Agroalimentarias (AGACA) son os encargados de impartir as 7 sesións das que consta o programa.
O obradoiro está destinado a mulleres socias de cooperativas co obxectivo de que adquiran independencia e capacidade de decisión nos seus entornos profesionais, no eido das estruturas operativas das cooperativas. Só en Feiraco, as mulleres supoñen o 50% dos socios da cooperativa de gandeiros e contamos co grupo Mulleres de Seu, integrado polas socias da nosa Cooperativa, para promover o desenvolvemento das mulleres e dignificar o seu papel no eido rural.
Reivindicación do rol da muller
Tradicionalmente en Galicia a muller tivo un papel protagonista nas tarefas agrogandeiras que non se ve reflectido nos organismos de toma de decisións. As sesións do Obradoiro para o empoderamento da muller abordarán, entre outros asuntos, cuestións tan importantes e decisivas como:
Os obstáculos que se atopan no seu camiño de acceso aos órganos de decisión.
As estratexias para a eliminación de estereotipos de xénero.
Os retos do mundo cooperativo.
Habilidades directivas.
Lexislación vixente.
Aspectos regulatorios que afectan as cooperativas.
Consulta o programa completo do obradoiro en PDF
Cando se imparte o obradoiro
O obradoiro para o empoderamento da muller como persoa socia da cooperativa desenvólvese en 7 sesións, dous xoves de cada mes, entre xuño e setembro de 2016, na sede da Fundación Feiraco, da man da Asociación Galega de Cooperativas Agroalimentarias.
Que é a Rede Eusumo?
Rede Eusumo é unha rede de colaboración para impulsar o espíritu emprendedor, prestando apoio directo a creación e consolidación do emprego con base na economía social, ademais de para fomentar o modelo empresarial no eido local, mediante accións formativas, divulgación e asesoramento para o autoemprego cooperativo.