Como nos gusta isto de disfrazarnos! Por terceiro ano consecutivo, distribuímos unha edición especial dos nosos envases de leite Feiraco con motivo da celebración do Entroido.
Pirata, superheroe e shériff… Quen non se disfrazou algunha vez dalgún destes tres personaxes míticos? Pois as nosas vacas aínda non o fixeran! Así que este ano non o dubidaron: capa nas costas, parche no ollo e chapeu vaqueiro para gozar da festa coas mellores galas. Desta guisa as veredes presumindo con moito garbo en todos os nosos puntos de venda.
E non queren facelo soas! En Feiraco sumámonos á celebración dunha das festas máis importantes de Galicia invitándovos a todos a seguir os pasos dos nosos briks. Así que, como di o slogan, “maiores e meniños todos ben disfrazadiños”. Preparados xa para vivir o Entroido?
O Entroido sabe a Feiraco
Como seguro que xa recordaredes, non é a primeira vez que vestimos de entroido os nosos cartóns de leite enteiro, leite semidesnatado e leite desnatado. Se en 2012 lucían do máis vistoso ataviados de tradicionais “choqueiros” na campaña “Neste Entroido todas as vacas queren ser Feiraco“, o ano pasado fixemos a nosa particular homenaxe a dúas das máscaras máis características do Entroido ourensán con “O Entroido sabe a Feiraco“: cigarróns e peliqueiros.
Como nas edicións anteriores, ademais da personalización dos briks, non faltará publicidade exterior e online, accións específicas nos puntos de venda e todo o ruído que se nos ocorra facer. E é que todo é pouco para sumarnos á celebración!
E unha última nota, esta vez culinaria. Aínda non sodes fans do perfil de Feiraco en facebook? Non dubidedes en pasarvos pola nosa páxina, onde xa temos todo a punto para organizar o noso tradicional concurso de receitas de Entroido.
Que vos parece a edición especial dos nosos envases? Gústanvos este tipo de accións?