Feiraco volverá reivindicar neste Nadal aquilo que realmente importa: estar xuntos. Co espírito cooperativo que caracteriza á marca e co compromiso de coidar das persoas e das tradicións, a entidade pon en marcha a iniciativa ‘Un Nadal para todos’, coa que busca tender pontes entre xeracións e recuperar a esencia que fai do Nadal unha época especial para reconectar e desfrutar xuntos.
A primeira actividade foi unha visita do centro de maiores Raiola O Hórreo ao Belén de CLUN, instalado por segundo ano consecutivo no Pazo de Raxoi. Un espazo no que a tradición e a vida rural cobran vida a través dun coidado traballo artesanal de preto dun cento de figuras. O Belén pon en valor a vida no campo, mostrando con detalle o traballo de agricultores e gandeiros. Ademais, incorpora elementos propios da cultura e tradición galega, como unha escola típica, un tractor, unha escena de matanza e un hórreo.
Despois da visita, Feiraco ofreceu ás persoas participantes un chocolate con leite quente, creando un momento especial para compartir conversacións, sorrisos e tempo de calidade.
A música será outra das protagonistas, xa que en colaboración coa Escola de Música de Negreira, un grupo de nenos e nenas visitaron o centro de maiores da Baña para interpretar panxoliñas tradicionais. Ao rematar, pequenos e maiores gozaron xuntos dun chocolate con leite Feiraco, creando un momento máxico deses que perduran para sempre.
Con este ‘Nadal para todos’, Feiraco quere lembrar que estas datas son un momento especial para conectar e coidarnos uns a outros, sen esquecer a beleza das tradicións que pasan de xeración en xeración.